Føroyameistarin í Effo Deildini funnin

Finalan í Effo Deildini í eSporti varð leikt 28. desember 2020. Spælt varð í spælinum League Of Legends og við í finaluni vóru liðini Tenacious Gaming og TikTok Terrorists. Tað varð liðið TikTok Terrorists, ið bleiv føroyameistari. Leikararnir á liðnum eru Magnus F. Lamhauge, Kristin Rønne Olsen, Rúni Lave, Heini Sjóvará, Sámal Fagraklett og Aleksandur Christensen.

Finalan varð hildin í høvuðsbygninginum hjá Effo á Óðinshædd. Hetta er fyrstu ferð eitt kappingarár við spælinum League Of Legends er í eSporti í Føroyum. Finalan varð leikt uttan áskoðarar í hølinum hesaferð, men bleiv stroymd beinleiðis á heimasíðuni hjá eSport og Twitch, so áhugaðið kundu fylgja við.

16 lið meldaðu seg til kappingarárið, harav vóru 8 lið sum komu við í Effo Deildina og 8 lið í 2. Deild. Kappingin byrjaði 3. november og bólkaspælið hevur verið leikt í 14 umførum, har liðini hava leikt ímóti hvørjum øðrum tvær ferðir. Semifinalurnar vóru leiktar 21. og 22. desember har Tenacious Gaming vann á No Clue og TikTok Terrorists vann á Xaroe.

Spælið verður mett at vera heimsins mest spælda eSport spæl kring heimin, og eisini í Føroyum er spælið væl móttikið, tí mett verður at um 1000 føroyingar eiga og spæla Leauge Of Legends.

Effo ynskir TikTok Terrorists hjartaliga tillukku við føroyameistaraheitinum.

Fá okkara tíðindabræv við at melda til her