Spariráð til heimið

Hav hitan í øllum rúmum standandi á uml. 21 stigum

21 stig er passaliga heitt fyri tey flestu. Fyri hvørt stig hitin fer upp um 21 stig, økist orkunýtslan við 5 %. Tú fært mest burturúr hitaskipanini, um hon arbeiðir javnt

Hav termostat á radiatorum og lat allar radiatorar í sama rúmi standa á sama stigi.

So arbeiðir hitaskipanin javnt, og komfortin verður betri.

Lækka hitan 2-3 stig um náttina og tá fólk ikki eru í húsinum

Tað er óneyðugt at hava hitan á 21 stigum, tá ið fólk sova ella eru úti í longri tíð. Tú sparir uml. 10 % av orkunýtsluni til upphiting við at lækka hitan um náttina.

Legg ikki klæðir til turkingar á radiatorunum

Hitabreiðslan frá radiatorum verður órógvað, um teir eru dekkaðir av klæðum ella líknandi. Tað kann eisini geva trupulleikar við slevju, um tú turkar klæði á radiatorum í búrúmum.

Set ikki innbúgv frammanfyri radiatorarnar.

Sum nevnt omanfyri verður hitabreiðslan frá radiatorum órógvað, um teir eru dekkaðir.

Lat bert vindeyguni vera opin í lítla løtu, tá ið tú luftar út.

Lufta út við gjøgnumtrekki í 5-10 min, 2-3 ferðir dagliga og skrúva radiatorarnar fyri ímeðan.

Er gólvhiti og radiatorur í sama rúmi, hav so meir hita á radiatorinum.

Radiatorurin er skjótari at stilla.

Tað er nóg mikið at hava tað heita vatnið á 50 stigum.

Tað er kostnaðarmikið at hita vatn og tí ikki ráðiligt at hita ov nógv. Tó skal tryggjast at vandi ikki er fyri legionella bakteriuvøkstri í vatninum.

Nýt bara heitt vatn, har tað neyðugt.

Nýt fat ella propp, og ikki vaskaupp undir rennandi heitum vatni.

Far heldur undir brúsu, enn í bað

Eitt brúsubað á fimm minuttir brúkar o.u. 45 litrar av vatni. Eitt karbað brúkar o.u 125 l av vatni.

Tað er ofta nóg mikið, at sirkulatiónspumpan á ketlinum stendur á fyrsta stigi

Tað er dýrari í streymi at hava pumpuna á ov høgum stigi. Harafturat gevur tað eisini størri hitatap í rørskipanini, av tí at vatnið verður pumpað runt óneyðugt.

Hav regluligt eftirlit við ketli og oljufýring

Regluligt eftirlit, reinsing og innstilling er við til at tryggja, at skipanin altíð koyrir á skynsamasta hátt.